تخاريف لللأديب / عادل رشاد
************************ آمتى يانخله تطرحى بلحك من جديد ؟
مالك يانخله ؟
ميلتى ليه وعودك إنحنى ؟ بقى شوية هواء يميلوا بيكى يمين وشمال لدرجة ان جريدك كان هاينزل على الأرض ويلمس التراب طيب قومى وحدى الرحمن
إوعى تكونى عجّزتى ولا تكون الشيخوخه نخرت فى جذورك فأصابة الهشاشه عظامك مش شوية هواء هما اللى هايتعبوكى ولا شوية مطر هما اللى هايغرقوكى ولاحتى شوية ريح يقدروا يحركوكى
ياما كانوا بيرموكى بالحجاره وكنتى بتبتسميلهم ومن بلحك ورطبك بترميلهم
وكل مايرموكى أكتر تنعمى عليهم ببلحك وتمرك أكتر وأكتر وأكتر وهما فرحانين وبعلو صوتهم مهللين وكأنهم جيوش قد غارت على العدو وألحقوا بهم النصر مبين
مش حاسين بألمك ولاعارفين إن كل ضربه بيضربوهالك بتعلم فى جسمك وبتكتر من حزنك بس مايعرفوش إنها فى نفس الوقت بتزود من صلابتك وبتقوى من عزيمتك
كنت بسمعك بتقوللهم استنوا لما يستوى تمرى وأنا هاميل بجزعى وأقدمهولكم لكن كلامك كان بيضيع فى الهواء وماكنش حد بيسمعه عارفه ليه ؟ لأنك عاليه عاليه أوى فوق فوق فوق وهما تحت
كل همهم يلموا من على الأرض خيرك اللى رموه بالحجاره وحتى لو جه عليه التراب بأديهم وهدومهم يمسحوه وبنفسهم ينفخوه وبالرغم من كده بياكلوه ومش عارفين ان اللى بياكلوه ده هما اللى قضوا عليه و موتوه
مالك يانخله ؟
وقفتى طرحك ليه ؟
معقول سباطتك اللى كانت مليانه بالبلح يتبدل بلحها دموع ؟
معقول الحزن اللى جواكى يخرج ثمرك على هيئة دموع ؟
معقول جريدك يبس ونشف وإصفر لونه وهو لسه عود أخضر فى عزالربيع ؟
بالله عليكى يانخله ياصاحبة التمر اللذيذ صارحينى ايه اللى خلى شكلك حزين ؟
حبايبك ؟ ولا خلانك ؟ ولا إتعرضتى لقهر عظيم ؟
ولا كتر قذف الحجاره كان زى السهام بتدخل نصالها فى جسمك حتى ينزف قلبك ويملأ الدمع عيدان طرحك بعد أن دبل بلحك وصار نواه عظم من غير لحمٍ هزيل
قومى يانخله إنفضى دموعك وحزنك وإصنعى منهم سد منيع وقولى للشمس هلى فى صباح يوم جديد نملأ سنابل عيدانا بتمر جميل
بس قوليلى بالله عليكى
أمتى يانخله تطرحى بلحك من جديد ؟
تخاريف للأديب / عادل رشاد
Aucun commentaire:
Enregistrer un commentaire